Нацдэмам зробіш шкоду — не пакараюць зроду
Жыхарка Мінска ўпрыгожыла свае вокны белымі і чырвонымі сняжынкамі. Ноччу зламыснікі ў масках (іх зафіксавала відэакамера) шпурнулі ў вокны гайкі, разбілі шкло. Службоўцы з Маскоўскага РАУС адмовіліся шукаць хуліганаў, бо, маўляў, сваім учынкам яны «выказалі нязгоду з размяшчэннем у акне вобраза бел-чырвона-белага сцяга».
Навукай людзям, што пітон не п’е віно і самогон
Для прываблівання наведвальнікаў у зале гульнявых аўтаматаў адна з магілёўскіх забаўляльных устаноў трымала пітона. Паўзун вырваўся на волю, напаў на прыбіральшчыцу, і тры здаровыя мужыкі не змаглі вызваліць дзяўчыну са смяротных «абдымкаў». І толькі пасля таго, як пітону ўлілі ў пашчу гарэлку, драпежнік аслабіў хватку і выпусціў ахвяру…
У спорце сёння цырк на дроце: рэкорд пабілі па дурноце
Нацыянальны Алімпійскі камітэт паведаміў, што ліст у падтрымку існай улады падпісалі ўжо 5 тысяч спартсменаў. А хто ж яны? У спісе вельмі шмат так званых спартсменаў-аматараў. Напрыклад, у Светлагорску свой подпіс паставілі амаль усе кіраўнікі райвыканкама: старшыня, кіраўнік справамі, начальнік фінаддзела, галоўны ідэолаг і г.д. Многа «спартсменаў» сярод міліцыянераў. А ў Лідзе ў хакеісткі запісалі дзвюх прыбіральшчыц, бухгалтара, ветэрынара…
Падсуднага няма ў судзе, ды ўсё адно працэс ідзе
Журналістка БалаПАН Віялета Саўчыц асвятляла пратэстную акцыю інвалідаў. Міліцыя яе не затрымала. Аднак праз некаторы час на журналістку быў складзены пратакол “за ўдзел у акцыі”, які яна не падпісвала. Неўзабаве суд Заводскага раёна г. Мінска без прысутнасці В. Саўчыц, завочна, аштрафаваў яе на 810 рублёў.
Пакаяўся б і за суды — у рай папаў бы сапраўды
У Віцебску дзяўчына ішла па вуліцы з белымі і чырвонымі паветранымі шарыкамі, якія ёй тут жа, на вуліцы, падарыла дачка сяброўкі. Міліцыянты затрымалі дзяўчыну і склалі пратакол аб тым, што яна “спынялася на некалькі хвілін, прыцягваючы ўвагу прахожых”. Суддзя Міхаіл Юрчанка спачатку паслаў матэрыялы на даследаванне, а на другім пасяджэнні ўвогуле спыніў справу, пасля чаго папрасіў у дзяўчыны прабачэння за дзеянні супрацоўнікаў міліцыі…
Ці тыя сімвалы і знакі замазваюць у нас служакі?
На будынку па вуліцы Гарадоцкай у Маладзечне тэрмінова замазалі малюнкі ў спалучэнні белага і чырвонага колераў. Між іншым, свастыка, намаляваная на гэтым жа будынку, не сціралася цэлы месяц…
Не кожны ведае пра гэта: вяртацца — дрэнная прыкмета
У адной з мінскіх крам жанчына забыла сумачку. Другая жанчына, пенсіянерка, забрала з кашалька грошы і сышла. Аднак неўзабаве вярнулася, каб пераканацца, што нічога каштоўнага ў сумачцы не засталося. Тады яе і затрымалі…
Другая ў прарэктара ніша: даносы цяперака піша
Прарэктар Беларускага дзяржаўнага эканамічнага ўніверсітэта звярнуўся ў міліцыю, каб студэнтаў прыцягнулі да адміністрацыйнай адказнасці. Пратэстуючы супраць гвалту над пенсіянерамі, студэнты паўгадзіны сядзелі на прыступках лесвіцы каля корпуса №4. Пасля заявы прарэктара 11 маладзёнаў выклікалі ў міліцыю, двое атрымалі па 15 сутак арышту, астатнія — штрафы.
Надзея ёсць, што вельмі скора судзіцьме суд і пракурора
Жыхар Смаргоні Ілля Петуноў падаў у суд заяву на раённага пракурора, які вынес яму папярэджанне за “неналежнае выхаванне непаўналетняга сына”. Поводле пастановы пракурора, І. Петуноў разам з сынам “знаходзіўся на несанкцыяваным масавым мерапрыемстве, дзе брыдкасловяць і агучваюць лозунгі, што ставіць пад пагрозу жыццё дзіцяці…”
Пі ці каву, ці віно — заграбуць усё адно
У магілёўскім скверы на бульвары Непакароных быў затрыманы грамадзянін Алег Цітоў, які піў каву на лаўцы. У Кастрычніцкім РУУС на яго склалі пратакол за адзіночны пікет. Мазгі гарэлка людзям паліць, І так было ва ўсе вякі… З юнацтва захавала памяць Малюнак ранішні такі: